黃子華棟篤笑前晚正式開鑼,獲朱茵、黃貫中及劉青雲夫婦等圈中人捧場,氣氛熱烈!子華貫徹其作風,盡情揶揄社會時事及娛圈動態,毫不留情兼絕不口軟,四大笑位數畀你睇!
黃子華的《棟篤笑嘩眾取寵》Talk騷,前晚在灣仔伊館首演,吸引朱茵、黃貫中、陳法蓉、吳鎮宇及劉青雲夫婦等捧場,全場座無虛席。子華甫出場即施展渾身解數放笑彈,他先脫去上衣搞氣氛,並先邀請一名女觀眾上台扮結婚並當眾宣誓,宣誓時問到要兄弟還是老婆時,子華妙答:「我揀兄弟嘅老婆!」笑爆全場。
玩埋賭王
子華再發揮搞笑天分,談到Talk騷近年成為不少藝人的搵錢途徑,對此他自言壓力大:「我畀林海峰夾死,承受好大壓力!我成世人喺投資方面賴咗四次嘢,人生有幾多個十年吖!以前去澳門買兩盒蛋卷當贏啫!不過賭王入院唔關我事,祝佢早日康復!」
妙論床照
在騷中揶揄社會時事及娛圈動態的子華,亦有就床照事件及環保署醜聞作出抵死的言論,他說:「婚前性行為會令人身敗名裂,反而婚外情就令人致富!有人被偷睇後要出嚟道歉,反而偷睇者仲投訴人哋天真:『你都畀人咩過仲天真?』其實相信藝人形象等於真人性格嘅人先至係天真!姨婆教落偷睇咗人嘢要講對唔住或多謝,唔怪得姨婆早前對住個電腦猛咁講對唔住同多謝啦!」
窒環保署
講到環境保護署職員被指上班時間睇鹹網時,子華又有一番妙論:「有阿媽問個仔讀書嚟做乜,個仔話做政府工仲要係環保署。有環保署職員十二萬人工一個月,佢用咗一半返工時間嚟上鹹網,等於納稅人每月津貼六萬蚊畀佢睇,咁唔緊要,但六萬蚊可以買到一千隻成人光碟,咁點睇得晒呢?呢啲先真係浪費公帑。」他愈講愈興奮:「叫佢解釋件事佢竟然話『我哋唔會評論』,佢用咗『我哋』,原來之後又多一位月薪十萬嘅職員都係咁,可能喺環保署返工係好枯燥仲好燥熱添。」令台下觀眾拍爛手掌!
![0826-00470-030p1g1](http://dayo-wong.com/wp-content/uploads/0826-00470-030p1g1.jpg)
子華的造型似足尊尼特普在《魔盜王》的船長Look。
![0826-00470-030p2g2](http://dayo-wong.com/wp-content/uploads/0826-00470-030p2g2.jpg)
子華邀請女觀眾上台扮結婚並當眾宣誓,氹得她笑逐顏開!
![0826-00470-030p6g5](http://dayo-wong.com/wp-content/uploads/0826-00470-030p6g5.jpg)
黃子華寸環保署職員上班睇鹹網,等如浪費公帑!