一個藝人應唔應該關心政治,黃子華就認為係個人選擇,但佢覺得好多人要求藝人表態係一個嘅過份做法,佢話:「喺一個自由、容忍、包容社會唔應該咁做,有啲人表態等於冇咗份工,唔應該逼人表態,咁咪同中世紀嗰啲你係咪信教,唔信就捉去燒嘅一樣?特別逼一啲藝人表態,喺香港搵唔到食下個月冇租交點算,但若佢自己表態,大家同意與否佢都會為自己負責。我哋冇辦法唔承認香港大勢係咁,以前一齊工作嘅人,依家好多人收入來自中國,入唔到中國市場可能要轉做生意、搬運、剪頭髮,因香港容納唔到,香港電影有幾多人可以維生?正正因為條氣唔順,大家要求社會時亦要對自己有要求。」
政治生活化,社會怨氣大,藝人都唔可以倖免被要求表態,子華笑話:「喺呢個社會冇漏網之魚啦!喺中醫立場,係條氣唔順,成個社會都係,一個人條氣唔順,做乜嘢就算係睇任何電視台、電台或者睇樓,樣樣都頂住,一日條氣唔順,社會就會越來越細微都睇唔過眼,其實條氣唔順好簡單啫,執一劑藥,『普』伏苓加『選』七粉,五碗水煮埋一匙派嚟食,即係要有好公平公正嘅普選,如果唔係,條氣唔順就冇嘢傾得埋,當然食咗唔係能醫百病,但起碼順咗條氣先,條氣唔順好大問題㗎。」
![1388155015_f674](http://dayo-wong.com/wp-content/uploads/1388155015_f674.jpg)
黃子華認為如果條氣唔順,好易處理,執一劑藥,『普』伏苓加『選』七粉,五碗水煮埋一匙派嚟食。
![1388155017_681f](http://dayo-wong.com/wp-content/uploads/1388155017_681f.jpg)
果然係子華,講政治都不忙幽默一下。
![1388155023_e6f9](http://dayo-wong.com/wp-content/uploads/1388155023_e6f9.jpg)
子華仲話普選唔係解決所有問題,但條氣會順。
![1388155028_878b](http://dayo-wong.com/wp-content/uploads/1388155028_878b.jpg)
講到政治立場,子華認為唔應該迫藝人表態。