男神黃子華10月喺紅館舉行棟篤笑《唔黐線唔正常》,當時雨傘革命正進行得如火如荼,有傳因為內容涉及敏感佔中題材,所以子華唔單止被列入內地封殺名單,甚至連喺內地巡迴演出都要取消,不過事後子華嘅經理人就否認呢件事,仲話會如期進行。
其他藝人如期演出
馮仁昭噚日喺網上見到一張喺11月尾發嘅聲明,內容係話子華上星期六喺廣西體育中心體育館嘅《唔黐線唔正常》南寧站演出,因為受南寧大橋兩邊路口修建行車天橋,往返體育中心嘅車要兜路行,主辦單位考慮觀眾要適應交警部門發出嘅行車路線,為咗減少影響,所以決定將個騷改喺下年2月7日舉行。
不過最奇怪嘅係,喺呢段修橋改路期間,鄧紫棋(G.E.M.)、林俊傑分別喺上個月22號同呢個月6號如常喺呢個場館演出,李宗盛仲會喺後日開騷㖭!唔通真好似傳聞咁講,子華俾人封殺?呢個係子華喺內地巡迴演出嘅第一站,所以有網民都擔心內地其他地方嘅演出都會受影響,噚日馮仁昭打畀子華嘅經理人了解,佢話:「唔關事,佢哋嗰邊都係咁講,我哋2月都會繼續做,我哋月尾都要返廣州開騷。」
![18ec6p5e](http://dayo-wong.com/wp-content/uploads/18ec6p5e.jpg)
子華喺廣西嘅棟篤笑因為整路而取消,但其他歌手冇受影響,認真莫名其妙!