「男神」呢兩個字,成日都聽到人講,個個都可以係男神咁,但又有冇一個係大家公認嘅男神呢?今日高登瓊姐就喺facebook搞咗個娛圍男神選舉,實行要搵一個真男神出嚟。
今次瓊姐搞嘅男神選舉,就人人都可以提名,只要提名瓊姐睇完核實咗之後,大家就可以一like一票,嚴格嚟講都算係一人一票(有幾個facebook帳號另計)。
個post出咗短短個幾鐘,已經有好多網民提咗名同投票,被提名嘅有:劉德華、郭富城、金城武、黎明、黃子華、張敬軒、碧咸、周星馳、Johnny Depp、盧海鵬等等,不能盡錄。
而暫時得票最高就係黃子華,暫時以2304個like領先,黎明就以976個like緊隨其後,網民睇好子華:「子華神應該無對手。」「 真係3歲到80歲嘅男同女都會認同佢係男神嘅事實,無得輸。」「黃子華眾望所歸!」連王宗堯都留言話:「子華堅啊!」
個選舉7月12號就會截止,7月14號就會公佈邊個係真正嘅男神,到底子華係唔係真係眾望所歸呢?
瓊姐喺facebook搞咗個娛樂圈男神選舉
子華高票領先